நீங்கள்தானே மதம் மாறியாகவேண்டும் என்று சொன்னீர்கள்.

அது நான் மனு ஸ்ம்ருதியின் பிடியில் இருந்து உங்களை விடுவிக்க அப்படிச் சொன்னேன். மனு ஸ்ம்ருதி இன்று பரணில் போடப்பட்டுவிட்டது. அதோடு இன்று புதிய ஸ்ம்ருதி எழுதப்பட்டுவிட்டது. இன்று நீங்கள் இந்துவாக இருந்தாலே, இந்துவாக இருந்தால்தான் உங்களுக்கு அரசின் நலத்திட்டங்கள் கிடைக்கும். கிடைக்கவேண்டும்.

கிறிஸ்தவத்தை நீங்கள் ஏன் எதிர்க்கிறீர்கள் அண்ணலே.

முதலாவதாக அது தலித்களுக்கு மட்டும் தன் சேவையைக் குறுக்கிக்கொண்டிருக்கவில்லை.

அதில் என்ன தவறு இருக்கிறது?

அது எப்படி சரியென்றுசொல்லமுடியும்?

மனித குலம் அனைத்தின் மீட்பர்தானே இயேசு.

காவலர் என்றால் கயவர்களுக்குத் துணை போகக்கூடாது. தீண்டாமையை ஒழிப்பதென்றால் தீண்டாமையைக் கடைப்பிடித்தவர்களுக்கு உதவி செய்வதா? தனது பள்ளிகளில் தனது மருத்துவமனைகளில் தீண்டாமையைக் கைவிட்டவர்களுக்கு மட்டுமே சிகிச்சை என்று சொல்லியிருந்தால் என்றைக்கோ தீண்டாமை ஒழிந்திருக்குமே. ஆனால், அவர்கள் மேல் ஜாதிகளில் இருந்தும் பலர் கிறிஸ்தவர்களாகவேண்டும் என்று விரும்பினார்கள். அதுகூடப் பரவாயில்லை அந்த மேல் ஜாதியினர் ஜாதிக் கொடுமையை கிறிஸ்தவத்துக்கு வந்த பின் கடைப்பிடித்தபோதும்கண்டுகொள்ளாமல் இருந்தனர். இன்றும் ஒரு ஜாதி இந்துவின் திருச்சபைக்கு தலித் பாதிரி தலைவராக முடியாதே. கிறிஸ்தவத்துக்குச் சென்ற பின்னும் ஜாதியைக் கொண்டுசெல்லும் ஜாதி கிறிஸ்தவரைவிட இந்துத்துவ அமைப்பில் சேர்ந்துகொண்டு ஜாதி உணர்வைக் கைவிட்டுவிட்டுவரும் ஓர் ஜாதி இந்து மேலானவர்தானே.

அந்தவகையில் இஸ்லாம் இன்னும் மேலானது அல்லவா? அவர்களுடைய மசூதியில் ஏற்றத் தாழ்வு இருப்பதில்லையே.

அவர்கள் மதத்தின் பேரில் தனி நாடு கேட்டார்கள். ஆனால், அதை வாங்கிக் கொண்டுவிட்டு இங்கேயே இருந்துவிட்டார்கள்.

நீங்களும் பாகிஸ்தன உருவாக ஆதரவு தெரிவித்திருந்தீர்களே அண்ணலே.

தனி நாடு கொடுக்காவிட்டால் உள்ளுக்குள் இருந்துகொண்டு முஸ்லிம்கள் கொடுக்கும் தொந்தரவுக்கு அவர்கள் பிரிந்து சென்று அதன் மூலம் வரும் பிரச்னையே மேல் என்பதால்தான் அப்படிச் சொன்னேன். அதோடு பாகிஸ்தானில் இருக்கும் இந்துக்கள், சீக்கியர்கள், கிறிஸ்தவர்கள், முஸ்லிம்கள் ஆகியோருக்கு நாம் அடைக்கலம் கொடுத்தாகவேண்டும் என்று அன்றே சொல்லியிருந்தேன். இன்று குடியுரிமை திருத்தச் சட்டம் என்ற பெயரில் அது கொண்டுவரப்பட்டிருப்பதைப் பார்க்கும்போது என் கனவு ஒன்று நனவாகப்போகும் மகிழ்ச்சியே எனக்கு ஏற்படுகிறது.

ஒரு அகதியை மத அடிப்படையில் விலக்குவது சரியாக இருக்குமா அண்ணலே.

இஸ்லாமியர் ஒருவருக்கு அதுவும் இந்துக்களுடன் எங்களால் வாழமுடியாதுஎன்று சொல்லி பாகிஸ்தான் என்ற ஒரு நாட்டைக் கேட்டு வாங்கிக் கொண்டு சென்றவர்கள், ஐம்பது வருடங்கள் கழித்து இந்தியாவுக்கு அடைக்கலம் தேடி வரும் முஸ்லிம்களுக்கு குடியுரிமை கொடு என்று கேட்டால் என்ன அர்த்தம். இதற்கு பாகிஸ்தான் என்ற ஒரு தனி நாடு தேவையே இல்லையே. இஸ்லாமிய அரசாலும் அவர்கள் ஒடுக்கப்படுவார்கள் என்றால் பேசாமல் இந்து ராஷ்டிரத்துடன் சேர்ந்துகொண்டுவிடலாமே. ஒரு விஷயம் சொல்லட்டுமா. முஸ்லிம்களுக்கு முஸ்லிம்களாக மாறாதவரையில் தலித்கள் மீது பாசம் எதுவும் கிடையாது. தலித்களை தலித்களாகவே ஏற்றுக்கொள்ளத் தயாராக இருப்பது இந்துத்துவர்கள் மட்டுமே. எனவே காலம் மாறும்போது அதற்கு ஏற்ப நம் கருத்துகளை மாற்றிக்கொள்ளத்தான் வேண்டும். அதோடு மத மாற்றம் என்பது இரண்டு காரணங்களினால் மிகவும் மோசமானது. முதலாவதாக அது சமூக சேவையை வியாபாரமாக்கிவிடுகிறது. சரியாகச் சொல்வதென்றால் ஒரு உதவியைச் செய்துவிட்டு உயிரைக் கொடு என்று பறித்துவிடுகிறது.

இது அபாண்டமான குற்றச்சாட்டு அண்ணலே.

இல்லை. நான் எதையும் மிகைப்படுத்தமாட்டேன். ஒரு இந்துவுக்குக் கல்வி கொடுத்துவிட்டு கிறிஸ்தவராக மாறு என்று கேட்பது அந்த இந்துவைக் கொல்வதற்குத்தான் சமம். ஒருவரை அவருடைய கலாசாரத்தில் இருந்து பிரிப்பதென்பது அவர்களுடைய முன்னோர்களைக் கொல்வதற்கு சமம். அந்த இந்து இந்துமரபில் தொடர்ந்து இருப்பதன் மூலமே அவருடைய முன்னோர்களை, அவர்களுடைய கலாசரத்தை உயிர்ப்புடன் திகழச்செய்வார். அதைக் கைவிட்டால் அவர்களைக் கொல்வதற்கு சமம். இயேசு என்ன சொல்லியிருக்கிறார் மகனுக்கும் தகப்பனுக்கும் மகளுக்கும் தாய்க்கும் மருமகளுக்கும் மாமிக்கும் பிரிவினை உண்டாக்க வந்தேன் என்றுதான் சொல்லியிருக்கிறார்.

அண்ணலே இல்லற வாழ்வில் இருந்து ஒருவரை சமூக நலனுக்காகக் குடும்பத்தைவிட்டு பிரிந்து வரச் செய்வதை அப்படிச் சொல்லியிருக்கிறார். குறுகிய சுய நலமான குடும்ப்ப் பாசத்துக்குப் பதிலாக பிறருடைய துயரையும் தன் துயராகப் பார்க்க வைப்பதை அப்படிச் சொல்லியிருக்கிறார்.

இதை அப்படிக் குறுக்கிவிடமுடியாது. ஒரு தமிழரை அவருடைய அப்பாவிடமிருந்து பிரிந்துவந்து அமெரிக்காவில் சமூக சேவை செய்ய வைத்தால் தவறில்லை. மீண்டும் அந்தத் தமிழரை அந்தக் குடும்பத்துக்கு அனுப்பிவைத்தால் பரவாயில்லை. நீ கிறிஸ்தவராக மாறி கம்பரை விட்டுவிட்டு வா… நீ கிறிஸ்தவராக மாறி ராஜராஜ சோழனை திட்டு என்று சொல்வது அந்தத் தமிழரைக் கொல்வதற்குச் சமம் தான்.

எதையும் எதிர்பார்க்காமல் உதவி செய்ய இந்த உலகில் யாரால் முடியும் அண்ணலே.

நன்றியை எதிர்பார்க்கலாம். ஒரு உதவிக்காக என் அடிமையாகிவிடு என்பது தவறு. கிறிஸ்தவமும் இஸ்லாமும் அதைத்தான் செய்கின்றன. அமெரிக்கா,, ஆஸ்திரேலியா, ஆஃப்ரிக்காவில் பூர்வ குடிகளை உடனே கொன்று குவித்தது. இந்தியாவில் சிறுகச் சிறுகக் கொல்கிறது. ஒரு ஊரில் ஒரு சிலுவை நடப்படுகிறதென்றால் ஒரு சிறு தெய்வம் கொல்லப்படுகிறது, கைவிடப்படுகிறது என்றுதான் அர்த்தம். கிறிஸ்தவத்துக்கு மாறிய பின்னும் உன் குலதெய்வத்தைக் கும்பிடு என்று என்றைக்காவது சொல்லியிருக்கிறார்களா?

நீங்கள் கூட உங்க உறுதிமொழியில் அதைச் சொல்லவில்லையே அண்ணலே.

நான் குல தெய்வத்தை கும்பிடாதே என்றும் சொல்லவில்லையே. அதோடு பௌத்தம் என்பது மாமிசப் படையலை மறுக்கக்கூடிய சன் மார்க்கம். எனவே அந்த ஆன்மிக அம்சத்துக்கு முக்கியத்துவம் தந்தேன். மத மாற்றத்தின் இரண்டாவது பெரிய அபாயம் என்னவென்றால், மதம் மாறுவதால் ஒருவர் தன் தாய் நாட்டுப் பற்றை இழந்துவிடுகிறார். நாட்டுக்கு எதிராகத் திருப்பப்படுகிறார். அதுதான் மிகப் பெரிய தவறு.

எப்படிச் சொல்கிறீர்கள் அண்ணலே, அப்துல்கலாம் இல்லையா கர்னேலியஸ் இல்லையா.

ஜின்னாவைப் பார்த்தும் இதைச் சொல்லமுடிந்திருந்தால் நன்றாக இருந்திருக்கும். தவ்ஹீத் ஜமாத்தைப் பார்த்தும் இதைச் சொல்லமுடிந்திருந்தால் நன்றாக இருந்திருக்கும். ஒரு அப்துல்கலாமினால் ஏற்பட்ட நல்லிணக்கத்தைவிட ஒரு ஜின்னாவினால் ஏற்பட்ட இழப்பே மிக அதிகம். எனவே மத மாற்றத்தை அதை அடிப்படையாகவைத்துத்தான் எடைபோடவேண்டும்.

தமிழகத்தில் இருக்கும் இஸ்லாமியர்கள் தனிநாடா கேட்கிறார்கள்.

இன்று கேட்கவில்லை. நாளை கேட்பார்கள்.

இது பெரிய அவதூறு அண்ணலே.

பங்களாதேசம் தெரியுமா உங்களுக்கு.

ஆமாம்.

அது எப்படி உருவானது என்று தெரியுமா?

பாகிஸ்தானின் பிடியில் இருந்து விடுதலை வேண்டும் என்று கேட்டார்கள்.

ஆமாம். அனைத்து வங்காளிகளுக்கான ஒரு நாடு. நாம் வங்காளிகள் என்று சொல்லித்தான் போராட்டத்தை ஆரம்பித்தார்கள். இந்தியாவும் அதைப் பெற்றுக் கொடுத்தது. பத்தே ஆண்டுகளில் வங்காளிகளை ஓட ஓட விரட்டி அடித்தார்கள். கொன்று குவித்தார்கள். பங்களாதேசம் ஒரு இஸ்லாமியக் குடியரசு என்று அறிவித்துவிட்டார்கள். பங்களாதேஷில் இருந்து அடித்துவிரட்டப்பட்டவர்களில் பெரும்பாலானவர்கள் தலித்களே. அவர்களுக்கு வங்காள இந்துக்களால் நேர்ந்த கொடுமையைவிட வங்காள முஸ்லிம்களால் அதாவது முஸ்லிம்களால் ஏற்பட்ட கொடுமையே அதிகம். இங்கும் நாம் தமிழர்கள் என்று ஆரம்பிப்பார்கள். நாளைக்கே தமிழை விட்டுவிட்டு நாம் கிறிஸ்தவர், நாம் முஸ்லிம் என்று மாறிவிடுவார்கள். மாற்றிவிடுவார்கள். மாறவில்லையென்றால் அடித்துவிரட்டுவார்கள். கொன்று குவிப்பார்கள். நான் வரலாற்றில் இருந்து பாடம் கற்றுக் கொள்ளச் சொல்கிறேன். அவதூறு செய்யவில்லை. எதையும் மிகைப்படுத்தவில்லை.

நீங்கள் வகுத்துக்கொடுத்த அரசியல் சாசனத்தில் மத மாற்றத்துக்கு அனுமதி தந்திருக்கிறீர்களே?

இல்லை. மத பிரசாரத்துக்கும் மதச் சடங்குகளைப் பின்பற்றும் சுதந்தரத்துக்கும்தான் இடம் தந்திருக்கிறேன். வலியவர் தன் சக்தியைப் பயன்படுத்திச் செய்யும் மத மாற்றத்துக்கு அல்ல. ஒரு மரத்தை வெட்டினால் நான்கு கன்றுகளை நடவேண்டும் என்று சொல்வதுபோல் ஒருவரை மதம் மாற்றினால் மாற்றப்பட்டவரின் கலாசாரத்துக்கு மரபுக்கு நான்கு உதவிகள், நன்மைகள் செய்யவேண்டும் என்று சொல்லியிருக்கவேண்டும். சிறுபான்மை என்ற பெயரில் அரசின் உதவிகளைப் பெற்றால் பெரும்பான்மைகளின் கலாசாரத்துக்கு நான்கு நன்மைகளை நல்லிணக்க நோக்கில் செய்யவேண்டும் என்று சொல்லியிருக்கவேண்டும்.

அப்படியானால் நீங்கள் என்னதான் சொல்கிறீர்கள் அண்ணலே. அடங்கு அத்துமீறு கலகம் செய் என்று சொன்னதெல்லாம் பொய்யா.

இல்லை. நிச்சயம் இல்லை. இப்போதும் அதையேதான் சொல்கிறேன். ஆபிரஹாமிய மதங்களின் பிரிவினைவாதங்களுக்குள் அடங்க மறு ஆபிரஹாமிய மதங்களின் ஏய்ப்புகளிலிருந்து அத்துமீறு; ஆபிரஹாமிய மதங்களின் தந்திரங்களை எதிர்த்துக் கலகம் செய்; நல்லிணக்க மலர்களை நயமுடன் சூடிக்கொள்; அனைவருக்குமான வளர்ச்சியை அரவணைத்துக்கொள்; அழிவற்ற தர்மத்தை ஆர்வத்துடன் பற்றிக்கொள் என்று சொல்பவர் மரியம்மாளையும் ஜானையும் மேடைக்கு வரச் சொல்கிறார்.

பய பக்தியுடன் அவரை நெருங்குபவர்கள் அவர் காலில் விழுந்து வணங்குகிறார்கள். அவர்களை ஆசிர்வதிப்பவர், நான் சொல்வதைக் கேட்பீர்களா நீங்கள் என்கிறார்.

நிச்சயமாக அண்ணலே. நீங்கள் சொல்லவேண்டாம். உத்தரவிடுங்கள்.

நான் உத்தரவெல்லாம் விட விரும்பவில்லை. நான் எழுதிய அரசியல் சாசனத்தின் மீது உங்களுக்கு நம்பிக்கையிருந்தால்…

என்ன அண்ணலே இது கேள்வி. நீங்கள் சொன்னதே எங்களுக்கு வேதம்.

நல்லது. அது அனைவருக்கும் சம வாய்ப்பைத் தருகிறது என்ற நம்பிக்கை இருந்தால், பட்டியலினத்தினருக்கு பரிவுடன் சில பரிந்துரைகளைச் செய்திருக்கிறது என்ற நம்பிக்கை இருந்தால் அதற்கு விசுவாசமாக நடந்துகொள்ளுங்கள். இந்த முறை உறுதிமொழிகளை நான் எழுதிக் கொடுக்கப்போவதில்லை. நீங்களே எழுதிக் கொள்ளுங்கள் என்று பண்புடன் கேட்டுக்கொள்கிறார். கூடியிருக்கும் மக்களைப் பார்த்து நீங்களே ஒன்றுகூடிப் பேசி உறுதிமொழிகளை எழுதிக் கொண்டுவாருங்கள் என்று சொல்கிறார்.

மக்கள் அனைவரும் கலந்தாலோசிக்கின்றனர். அண்ணல் சொன்னதுபோல் பௌத்தத்துக்கே மாறுவோம் என்று சிலர் சொல்கிறார்கள். உயிர்கள் மீது கருணை கொள்ளவேண்டும் என்று அது சொல்கிறதே. அந்த உறுதிமொழியை எடுத்துவிட்டு அண்ணலுக்கு துரோகம் செய்ய முடியாது என்று சிலர் சொல்கிறார்கள்.

நாத்திகர்களாகிவிடுவோமா… இயற்கையின் படைப்பில் மனிதனைத் தவிர வேறு எந்த உயிரும் கடவுளை நம்பவில்லைஎன்று சிலர் சொல்கிறார்கள். விலங்குகளாக வாழ விரும்புபவர்களுக்குக் கடவுள் தேவையில்லை. மனிதர்களுக்கு அது அவசியம் என்று சிலர் சொல்கிறார்கள்.

சிராத்தங்கள் எல்லாம் செய்யவேண்டாம் என்று சிலர் சொல்கிறார்கள். இறந்த ஆத்மாக்களை கதி கெட்டு அலையவிட்டா அதைவிடப் பெரிய பாவம் ஒண்ணுமே இல்லை. அப்பறம் மனுஷன்னு நாம் சொல்லிக்கறதுல அர்த்தமே இல்லை என்கிறார் ஒரு முதியவர்.

ராஜராஜனைவிடவா நாம் புத்திசாலிகளென்று ஒருவர் கேட்கிறார். ராஜராஜனும் சில தவறுகள் செய்திருக்கிறாரே என்று இன்னொருவர் சொல்கிறார். ஆனால், அதை விக்டோரியா மகாராணிக்கு சாமரம் வீசியபடி சொல்லக்கூடாது அல்லவா… ஔரங்கஜீபுக்கு அடிவருடிக் கொடுத்தபடியே ராஜராஜனைத் திட்டக்க்கூடாது அல்லவா; மன்னர்களை எதிர்ப்பதென்றால் அனைத்து மன்னர்களையும் எதிர்க்கவேண்டும். அதுதான் அறத்தின் குரல். யாரேனும் ஒரு மன்னரை ஆதரிப்பதென்றால் குறைந்த தவறுகள் செய்தவரை ஏற்றுக்கொள்ளவேண்டும். அவர் நம்மவராக இருந்தால் தலையில் தூக்கிவைத்துக் கொண்டாடவேண்டும் என்று சொல்கிறார் முதலாமவர்.

இப்படி ஒவ்வொரு விஷயமாகப் பேசி அனைவரும் சேர்ந்து எழுதிக் கொடுத்த உறுதிமொழிப் பட்டியலை எடுத்துக்கொண்டு அம்பேத்கரிடம் சென்று கொடுக்கிறார்கள். அதைப் படித்துப் பார்க்கும் அவர் புன்முறுவல் பூத்தபடியே அவர்களை ஆசிர்வதித்து மேடையில் நடுவில் அவர்களைக் கொண்டுவந்து நிறுத்துகிறார். அங்கே குங்குமச் சிமிழ், சிலுவை டாலர், குல்லா ஆகியவை வைக்கப்பட்டிருக்கின்றன.

மரியம் மிகுந்த பதற்றத்துடன் காணப்படுகிறார். அம்பேத்கர் அருகில் இருந்த மண் பானையில் இருந்து நீர் முகர்ந்துகொடுக்கிறார். அதைக் குடித்ததும் சற்று ஆசுவாசமடைகிறார் மரியம். தைரியமாகப் பேசுங்கள் என்று உற்சாகப்படுத்துகிறார் அம்பேத்கர்.

நம்பிக்கையையும் துணிச்சலையும் வரவழைத்துக்கொள்ளும் மரியம்மா, உரத்த குரலில் உறுதிமொழி எடுக்க ஆரம்பிக்கிறார்.

மாரியம்மாவாகிய நான்…

கூட்டம் ஆரவாரமாகக் கூச்சலிட்டுத் தன் மகிழ்ச்சியைத் தெரிவிக்கிறது. தணிந்த குரலில் அவர் பேசுவது உலகம் முழுவதும் எதிரொலிக்கிறது.

என் குல தெய்வ வழிபாட்டுக்குத் திரும்புகிறேன் என்று சொல்கிறார்.

பாதிரியாரின் உடம்பில் இறங்கியிருக்கும் அம்பேத்கரின் ஆன்மா, குங்குமத்தை எடுத்து இட்டுவிடுகிறது.

இனிமேல் நாங்கள், கர்த்தரையோ அவருடைய குமரனையோ கன்னி மரியாளையோ பரிசுத்த ஆவியையோ அல்லாவையோ அவருடைய இறைத்தூதரையோ வழிபடமாட்டோம்.

உறுதிமொழிகள் தொடர்கின்றன.

மாரியம்மாளின் பாட்டியும் தாத்தாவும் விண்ணில் இருந்தபடி மலர் தூவி ஆசிர்வதிக்கின்றனர்.

ஓரமாக அமர்ந்திருக்கும் உதவி பாஸ்டர் சலிப்புடன் கேட்கிறார்: என்ன அச்சோ… இவனும் பேசிக்கிட்டே இருக்கான். இவன் சொல்லி யாரு கேட்கப் போறாங்க.

கொஞ்சம் பொறுடே. கடைசில இவன் ஒண்ணு சொல்லுவான் பாரு. அதை எல்லாரும் கேட்டே ஆகவேண்டியிருக்கும்.

அப்படி என்ன மந்திரம் சொல்லப்போறான்.

ஒரு பேரைச் சொல்லப்போறான். அதைக் கேட்டு ஊரே உலகமே அதிரப்போகுது. ஒரு ஆவியை வரவைக்கப்போறான்.

ஆவியா… பிதா சுதன் பரிசுத்த ஆவியா அச்சா. அதை வெச்சு ஒத்தை இட்லியைக் கூட வேக வைக்கமுடியாதே அச்சா.

இல்லை மனுஷ ஆத்மாதான்.

யாரு அச்சோ… ஈ.வெ.ரா.வோட ஆவியா?

அவன் நேர்ல வந்துசொன்னதையே எவனும் கேட்கலை. ஆவியா வந்து சொல்றதையா கேட்கப்போறானுவ.

பின்ன யார் அச்சோ…

அதாண்டே இவனுங்களோட நேதாவு… பேரு சட்டுனு வாயில நுழைய மாட்டேங்குது. பீமனோ மாமனோ என்னவோ வருமேடே.

பீம ராவா.

ஆமா மக்ளே. அவரேதான்.

அய்யோ… அவர் வந்து என்ன பண்ணப்போறாரு.

இவனுங்க மட்டுமில்ல; இந்த நாடே அவர் சொன்னாக் கேட்கும்டே.

ஆனா அவரு வில்லங்கமான ஆளாச்சே அச்சோ. எல்லாரையும் பௌத்தத்துக்கு மாறுன்னுல்லா சொல்லுவாரு.

அங்கதான் நிக்கறான் இந்த அச்சனுக்கெல்லாம் அச்சன். வரப்போற அம்பேத்கர் ஆவி அம்புட்டு பேரையும் கிறிஸ்தவத்துகோ இஸ்லாத்துக்கோ மாறுன்னு சொல்லும்.

அதெப்படி அச்சா எழுதிக் கொடுத்தமாதிரியே சொல்றீங்க.

அதாக்கும் சங்கதி. அம்பேத்கர் ஆவி அவன் உடம்புல இறங்கியிருக்கறதாட்டு அவன் நடிக்கப்போறான். டயலாக் எல்லாம் முந்தியே எழுதிக் கொடுத்தாச்சு.

ஆசானே சூப்பர் ஐடியா. வேற யாரும் நம்பறாங்களோ இல்லியோ இந்த ஊர்க்காரனுங்க நம்புவானுங்க. இவனுங்க மொத்தமா மாறினாலே பெரிய விஷயம் தான்.

ஃபாதர் திட்டமிட்டதுபோல் திடீரென்று மின் விளக்குகள் விட்டுவிட்டு எரிகின்றன. பேய்க்காற்று வீசுவதுபோல் ஸ்பீக்கரில் பெரும் சத்தம் கேட்கிறது. அதோடு நிஜமாகவே பேய்க்காற்று வீசவும் செய்கிறது. அரங்கில் கூடியிருப்பவர்கள் அனைவரின் ஆடைகளும் படபடவென பறக்கின்றன.

ஃபாதர் சொன்ன லிஸ்ட்ல இதெல்லாம் இல்லையே; கரெண்ட் விளையாட்டும் மை செட் மாயங்களும் தான இருந்தது. சினிமாக்காரன்னா சினிமாக்காரந்தான்; தத்ரூபமா செட்டிங் போட்டிருக்கானுங்க என்று ஹஜ்ஜியார் பெருமிதப்படுகிறார். மேடையில் இருக்கும் நடிகர் தனக்குள் அம்பேதக்ரின் ஆவி இறங்கியதாக நடிக்க வேண்டிய நேரம் வந்துவிட்டதைப் புரிந்துகொள்கிறார். இனியும் தரையில் நின்று நடித்தால் பின்வரிசையில் இருப்பவர்களுக்குத் தெரியாதென்பதால் மேஜையில் ஏறி நிற்கலாம் என்று முடிவுசெய்கிறார்.

இடிச்சத்தம் உச்சத்தை எட்டுகிறது. மின் விளக்குகள் அணைந்து அணைந்து எரிகின்றன. மின்னல் வெட்டத் தொடங்குகிறது. கிராம மக்கள் என்ன நடக்கிறது என்று தெரியாமல் பதற்றத்தில் ஆழ்கிறார்கள்.

விஷயம் தெரிந்த சேனல் பிரமுகர்கள் சிலரும் ஹஜ்ஜியாரும் உதவி பாஸ்டரும் மேஜை மேல் ஏறி நின்று சூர்யா, அம்பேத்கரின் குரலில் பேசப்போவதை ஆவலுடன் எதிர்பார்த்துக் காத்து நிற்கிறார்கள். அப்போது மேஜையில் ஏறிய நடிகரைக் கீழே பிடித்துத் தள்ளியபடி மேடையில் பாய்ந்து ஏறுகிறார் பாதிரியார்.

அச்சோ என்ன ஆச்சு என்று அனைவரும் பதறுகிறார்கள்.

நிறுத்தி நிதானமாக பாதிரியாருக்குள் இறங்கிய ஆவி பேசத்தொடங்குகிறது.

பீமராவ் அம்பேத்கராகிய நான்…

*

பாதிரியாரின் உடம்புக்குள் பாபா சாஹேப் ஆவியாக இறங்கிய செய்தி கேட்டதும் தேசம் முழுவதிலும் உள்ள சேனல்கள் அனைத்தும் அதை பிரேக்கிங் நியூஸாக லைவாக ஒளிபரப்ப ஆரம்பிக்கின்றன. பி.பி.சி., அல் ஜஸீரா முதலான சர்வ தேச தொலைகாட்சி நிறுவனங்களும் ஒரு பாதிரியார் உடம்பில் இறங்கியிருப்பதால் மிகுந்த நம்பிக்கையுடன் அதை ஒளிபரப்புகின்றன. அண்ணல் கம்பீரமாக முழங்க ஆரம்பிக்கிறார்.

பீம்ராவ் அம்பேத்கராகிய நான் உங்களை மீண்டும் சந்திப்பதில் மிகுந்த மகிழ்ச்சி அடைகிறேன். மகாபலிச் சக்கரவர்த்தி தன் மக்களைப் பார்க்க ஆண்டுதோறும் வந்து போவதுபோல் உங்களைப் பார்க்கவும் வந்துபோக விரும்புகிறேன். மகாபலியின் வருகையின்போது அவருடைய நாட்டு மக்கள் அவரைப் பெரு மகிழ்ச்சியுடன் வரவேற்பதுபோல் நீங்களும் என்னை அன்புடன் வரவீற்பீர்கள் தானே.

கூட்டத்தினர் உற்சாகத்தில் வரவேற்போம் வரவேற்போம் என்று முழங்குகிறார்கள்.

நல்லது. அரசியல் சாசனம் உருவாக்கி நம் தேசத்தின் ஆட்சி நிர்வாகத்துக்கு என்னாலான பங்களித்திருந்தேன்.

பாரத் மாதாகி ஜே என்று முழங்குகிறார்கள்.

(அந்த வாழ்த்துக்கு தலைவணங்கி மரியாதை செய்துவிட்டு) அதுபோலவே சமூக மாற்றத்துக்கு ஓர் நல் வழியைக் கண்டு சொல்லியிருந்தேன்.

புத்தம் சரணம் கச்சாமி

தம்மம் சரணம் கச்சாமி

சங்கம் சரணம் கச்சாமி

என்று கூட்டத்தினர் முழங்குகிறார்கள்.

(கைகளால் அனைவருக்கும் ஆசி அளிப்பதுபோல் வாழ்த்து தெரிவித்துவிட்டு)

மனு ஸ்ம்ருதி கோலோச்சிய காலம் போய் மக்களின் ஸ்ம்ருதி கோலோச்சும் காலம் வந்துவிட்டிருக்கிறது.

ஜெய் பீம் ஜெய் பீம் என்ற கோஷங்கள் விண்ணை முட்டுகின்றன.

என் மறைவுக்குப் பின் நடந்துவரும் விஷயங்கள் எனக்குப் பாதி மகிழ்ச்சியையும் பாதி வருத்தத்தையும் தருகின்றன. நான் உங்களுக்கு உருவாக்கியளித்த அரசியல் சாசனம் முடிந்தவரை சிறப்பாக அமலாகிவருவதைப் பார்க்கும்போது மிகுந்த மகிழ்ச்சியளிக்கிறது. நான் உயிருடன் இருந்தபோது என்னை எதிர்த்த காங்கிரஸ்காரர்களும் கம்யூனிஸ்ட்களும் தங்கள் தலைவர்களில் ஒருவராக என்னையும் சொல்லிக் கொள்வதைப் பார்க்கும்போது அந்த மகிழ்ச்சி மேலும் அதிகரிக்கிறது. ஆனால், நானுமொரு சங்கத்தையே முன்வைத்தேன். சங்கத்தைச் சேர்ந்தவர்களைச் சங்கி என்று பழிப்பவர்கள் நான் சொன்ன சங்கத்தையும் சேர்த்துத்தான் பழிக்கிறார்கள்.

இந்தியாவில் இருக்கும் அனைவரும் நாம் இந்தியர் என்று தேச பக்தியுடன் செயல்பட்டாக வேண்டிய அவசியம் இன்று மேலும் அதிகரித்திருக்கிறது. இந்த தேசத்துக்கு இந்தியே ஆட்சி மொழியாக இருக்கவேண்டும் என்று நான் சொன்னது நிறைவேறவில்லை. நான் உருவாக்கிய அரசியல் சாசனத்தில் இந்திய ஒரு மதச்சார்பற்ற நாடு என்ற இடைச்செருகல் எனக்கு ஏற்புடையது அல்ல. எனினும், கலப்புத் திருமணமே ஜாதியை ஒழிப்பதற்கான ஒரே வழி என்ற என் கருத்துக்கேற்ப இன்றைய அரசு அத்தகைய திருமணங்களுக்கு சலுகை அளித்திருப்பதைப் பார்க்கையில் மனம் நிறைகிறது.

பட்டியலினத்து இளைஞர்களின் தொழில் வளர்ச்சிக்கு வழங்கும் கடனுதவிகள் நாம் சரியான திசையில் செல்கிறோம் என்பதை உணர்த்துகின்றன. என் எதிர்ப்பையும் மீறிக் கொண்டுவரப்பட்ட ஆர்ட்டிகிள் 370 நீக்கப்பட்டு இனி காஷ்மீரிலும் பட்டியலினத்தினரின் நலன் காக்கப்படும் என்பது உறுதியாகியிருக்கிறது.

ஆனால், சமூக அளவில் இன்று நடந்துவரும் மாற்றங்கள் என்னைப் பதற்றமடையச் செய்கின்றன. நான் மிகுந்த நம்பிக்கை வைத்திருந்த பௌத்தத்துக்கு என்னுடன் மதம் மாறிய மஹர்கள் மத்தியிலேயே பெரும் வரவேற்பு இல்லை என்பது மிகுந்த வேதனையைத் தருகிறது. அதோடு எந்த கிறிஸ்தவ ஆதிக்கமும் இஸ்லாமிய ஆதிக்கமும் உருவாகிவிடும் என்று அஞ்சி நான் பௌத்தத்துக்கு மாறச் சொன்னேனோ அதை கேட்காமல் கிறிஸ்தவத்துக்கும் இஸ்லாமுக்கும் சாரைசாரையாக மாறிவருவதைப் பார்க்கையில் மிகவும் வேதனையாக இருக்கிறது. இதுவா நான் உங்களுக்குக் கற்றுத் தந்தது? இதுவா என் சொற்களுக்கு நீங்கள் தரும் மரியாதை?

கூட்டம் மௌனமாகத் தலை குனிந்து நிற்கிறது.

இந்துவாகப் பிறந்தவர்கள் இந்துவாக இறக்கக்கூடாதென்று சொன்னீர்களே அண்ணலே. கிறிஸ்தவமும் இஸ்லாமும் மட்டும் தானே இங்கு இயங்கிவருகின்றன. பௌத்த நிறுவனங்கள் இங்கு பெரிதாக இல்லையே அண்ணலே.

வேறு தண்ணீர் கிடைக்கவில்லையென்றால், சாக்கடை நீரை எடுத்துக் குடித்துவிடலாமா? அதோடு பௌத்தத்தை நான் ஏன் தேர்ந்தெடுத்தேன். அது இந்து மதத்தில் இருந்து இந்திய கலாசாரத்தில் இருந்து அதிகம் விலகியிருக்கவில்லை என்பதால்தானே. ஒருவகையில் இந்துக்கள் உங்களை அரவணைத்துக் கொள்ளவேண்டும் என்ற எதிர்பார்ப்பிலும் ஜாதி இந்துக்களிடையே ஒரு பயம் கலந்த புரிதலை உருவாக்கவும்தானே அதை முன்வைத்தேன்.

எங்கள் தாகம் பெரிது அண்ணலே. உங்களுக்குத் தெரியாததா என்ன? இந்து மதத்தை விட்டு வெளியேறியாக வேண்டிய அதி அவசியமிருந்ததே அண்ணலே.

இந்து மதத்தில் நீங்கள் இருக்கவேண்டும் என்று நானும் சொல்லவில்லை. ஆனால் இந்திய அரசியல் சாசனம்தானே இன்றைய வேதம். அதோடு இந்துத்துவமும் செல்வாக்கு பெறத் தொடங்கிவிட்டிருக்கிறதே.

என்ன சொல்கிறீர்கள். இந்துத்துவம் எங்களுக்கும் இந்த தேசத்துக்கும் எப்படி நன்மையளிக்க முடியும்?

ஏன் முடியாது. ஒரு இஸ்லாமியர் அடைப்படைவாதம் நோக்கி நகர்ந்தால் அவர் மதவாதியாவார். ஒரு கிறிஸ்தவர் அடிப்படைவாதம் நோக்கி நகர்ந்தால் அவரும் மத வெறியராவார். ஆனால், ஒரு இந்து அடிப்படைவாதம் நோக்கி நகர்ந்தால் அவர் இந்து அடிப்படைகளில் இருந்து வெளியேறுவார். லிபரலாக இருந்த ஜின்னா முஸ்லிம் லீகின் தலைவரானதும் குல்லா அணிந்துகொண்டார். இந்து மகாசபையின் தலைவரானதும் நெற்றித்திலகத்தைத் தவிர்த்தார் சாவர்க்கர். எனக்கு முன்பே சம பந்த போஜனம் ஆரம்பித்து, தீண்டாமையை ஒழிக்க முன்வந்தது இந்துத்துவர்கள் தானே. அவர்களை நான் என் நண்பர்களாகத்தானே கருதினேன்.

என்ன இந்துத்துவர்களை நண்பர்களாகக் கருதியிருந்தீர்களா?

பின்னே. நான் போட்டியிட்ட ஒரே தேர்தலில் எனக்கு ஆதரவாக நின்றது அவர்கள்தானே. கம்யூனிஸ்ட் கட்சியும் காங்கிரஸும் என்னைத் தோற்கடிக்கத்தானே களம் கண்டன. 1990களுக்குப் பின்னர்தானே இந்த கம்யூனிஸ்ட்களும் காங்கிரஸ்காரர்களும் திராவிட இயக்கத்தினரும் என் பெயரைக் கைப்பற்ற முயற்சி மேற்கொண்டிருக்கிறார்கள். 1960களில் இருந்தே தமது அன்றாடப் பிரார்த்தனையில் மகத்தான மகரிஷிகள் தொடங்கி மகாத்மாக்கள் வரை வணங்கித் துதிக்கும் பட்டியலில் என் பெயரையும் அல்லவா இந்துத்துவர்கள் சேர்த்திருக்கிறார்கள்.

இஸ்லாமிய, கிறிஸ்தவ போரில் தலித்களை பகடைக்காய்களாக ஆக்கிக் கொள்வதுதானே இந்துத்துவர்களின் அஜெண்டா.

நான் உயிருடன் இருந்த காலத்தில் அவர்களுடன் பழகியிருக்கிறேன். அப்படி அவர்கள் நினைத்ததே இல்லை. என் காலத்துக்குப் பின்னர் அவர்கள் அளவுக்கு தலித்களுடன் அதிகாரத்தைப் பகிர்ந்துகொண்டவர்களும் தலித்களின் பொருளாதார முன்னேற்றத்துக்கும் எந்தக் கட்சியினரும் செய்யவில்லை. கம்யூனிஸ ஆட்சிகளிலும் காங்கிரஸ் ஆட்சிகளிலும் அதை எதிர்பார்க்கவும் முடியாதுதான். திராவிட ஆட்சியிலும் அது நடந்திருக்கவில்லை.

கட்சிகளைப் பற்றி நாம் அதிகம் எதையும் எதிர்பார்க்க முடியாதே. இஸ்லாமிய, கிறிஸ்தவ அமைப்புகள் முழுவதும் பட்டியலினத்தினரின் மேம்பாட்டுக்குத்தானே பாடுபடுகின்றன.

அப்படி அவர்கள் சொல்லிக் கொள்கிறார்கள். உண்மையில் இந்து மதத்தை அழிக்கும் போரில் தலித்களைப் பகடைக்காய்களாகப் பயன்படுத்துவது இஸ்லாமிய, கிறிஸ்தவ அமைப்புகள்தான்.

தலித்துகளுக்குக் கிடைத்திருக்கும் சேவைகளில் பெரும்பாலானவை கிறிஸ்தவர்களின் மூலம் கிடைத்தவையே.

கிறிஸ்தவர்களின் சேவைகளில் பெரும்பாலானவை அரசியல் சாசனமும் அதன்படி நடக்கும் அதிகாரவர்க்கமும் நடத்திக் கொடுத்தவையே.

நீங்கள் அரசியல் சாசனம் வகுத்திருந்தாலும் ஒரு பாதிரி தானே எங்களுக்கு உதவுகிறார். எங்கள் ஊரில் பட்டப் படிப்பு முடிந்த ஒரு இளைஞருக்கு வாடகை ஆட்டோ ஓட்டிப் பிழைக்கவேண்டுமென்றால் பாதிரியின் உதவியால்தானே அது நடக்கிறது.

கடைத்தேங்காயை எடுத்து வழிப் பிள்ளையாருக்கு உடைப்பதா? அரசியல் சாசனம் தந்திருக்கும் நல உதவியை வாங்கிக் கொடுத்துவிட்டு மதம் மாறச் சொல்கிறாரா? கேவலம். என் அரசியல் சாசனம் அனைவருக்கும் சம வசதி வாய்ப்புகளை உறுதிப்படுத்தியிருக்கும் நிலையில் நீங்கள் பௌத்தத்துக்கு மாற விரும்பவில்லையென்றால் கூடப் பரவாயில்லை. கிறிஸ்தவ, இஸ்லாமுக்கு ஏன் மாறுகிறீர்கள். அதோடு மதம் மாறிவிட்டு சான்றிதழில் இந்து என்று காட்டிக்கொண்டு ஏன் ஒரு தலித்தின் வயிற்றில் அடிக்கிறீர்கள்?